A sementeira áerea de triticale rexenera terreos queimados na media montaña ourensá
O proxecto CoberDron, desenvolvido por BENIU Soluciones e a Fundación Matrix, ensaia en máis de 90 hectáreas de Ourense unha nova vía para sementar terreos afectados polos incendios e reducir o risco de erosión
A recuperación dun monte despois dun incendio comeza contra o reloxo. Co solo desprotexido, as primeiras choivas poden arrastrar terra, cinzas e sedimentos, un risco que se incrementa nas zonas de forte pendente ou de difícil acceso. Para intervir nestes espazos, os drones poden converterse nunha ferramenta complementaria ás técnicas tradicionais de restauración.
É o que demostra a experiencia do proxecto CoberDron, desenvolvido por BENIU Soluciones e a Fundación Matrix nos montes de Vilamartín de Valdeorras (Ourense), afectados polos incendios de agosto de 2025. Durante o outono do pasado ano distribuíronse máis de 120 millóns de sementes de triticale sobre máis de 90 hectáreas, nunha actuación realizada en menos de dúas semanas.
As condicións do terreo converteron a actuación nun reto especialmente complexo: máis do 90 % da superficie tiña pendentes superiores aos 30 graos e aproximadamente un terzo superaba os 60 graos. As zonas de actuación situáronse entre os 550 e os 1.500 metros de altitude.
BENIU encargouse da planificación e execución da sementeira con drones, mentres que a Fundación Matrix, Investigación e Desenvolvemento Sostible, realizou o seguimento ecolóxico baixo a dirección do doutor Javier Montalvo, profesor de Ecoloxía da Universidade de Vigo.
Os primeiros resultados apuntan a unha distribución uniforme das sementes e a unha densidade acorde coa dose prevista. En condicións favorables de humidade, observouse unha resposta esperada na xerminación e emerxencia das plantas, mesmo en regueiros, cárcavas e outros puntos de difícil acceso. O desenvolvemento temperán das raíces do triticale permitiu, ademais, fixar as plantas ao terreo.
Regueiro de Focarón con bos resultados. Cedida
A proposta non pretende substituír a reforestación nin outras técnicas de restauración. A sementeira aérea pode combinarse con medidas como o mulching, o helimulching ou a propia rexeneración natural, sempre a partir dun diagnóstico específico de cada zona.
O proxecto abre así a porta a incorporar os drones aos plans de restauración postincendio cando a pendente, a urxencia ou a falta de accesos dificulten os medios convencionais.
