Hijos de Rivera recorre á computación cuántica e á intelixencia artificial para investigar os sabores do futuro

Hijos de Rivera está a desenvolver un proxecto de investigación no que se utilizou a computación cuántica e a Intelixencia Artificial para realizar unha simulación da percepción do sabor. A finalidade desta iniciativa é explorar as posibilidades que ofrece a tecnoloxía cuántica para avaliar as asociacións máis relevantes entre moléculas, coñecido no ámbito científico como “docking molecular”.

O equipo de I+D+i de Hijos de Rivera, tras tres anos de traballo con estas tecnoloxías, obtivo os primeiros resultados da súa investigación, realizada en colaboración co Fujitsu International Quantum Center, o Centro de Supercomputación de Galicia (CESGA) e a Universidade Católica San Antonio de Murcia (UCAM). Conseguiu simular o comportamento dos receptores de frescor presentes nas papilas gustativas, comportamento ao que non se puido dar explicación mediante os sistemas clásicos de análises. Trátase dun avance que permitirá, nun futuro, non só representar o sabor de determinados ingredientes, senón tamén avaliar o potencial emprego de biomoléculas co fin de lograr novos desenvolvementos na composición de alimentos e bebidas.

Este proxecto contou cun equipo multidisciplinar dirixido por Jose Vilariño, da área de I+D+i en Fillos de Rivera, e constituído por María Paredes, técnica de I+D da corporación e doutora en química computacional; Mariamo Mussa, doutora en física e investigadora en computación cuántica; Andrés Gómez, doutor en Física e coordinador do departamento de aplicacións e proxectos do CESGA; Alejandro Borrallo e Antón Rodríguez, físico teórico e físico cuántico do International Quantum Center Fujitsu; e Jochem Nelen, bioquímico do grupo de investigación de bioinformática de altas prestacións da UCAM.

Hijos de Rivera presentou as conclusións iniciais desta iniciativa no marco da segunda edición do foro de biotecnoloxía Galicia Biodays, celebrado este pasado mes de xuño en Vigo.