Novas tecnoloxías para monitorizar en campo o kiwi galego

A Deputación de Pontevedra, a través da Estación Fitopatolóxica Areeiro, participa no proxecto Kiwi-Sens. A través desta iniciativa búscase poñer en marcha un sistema integral de monitorización de cultivo mediante o uso de tecnoloxías IoT (Internet das cousas) de baixo coste e intelixencia artificial para a mellora da xestión e optimización do kiwi en Galicia.

A iniciativa, que se desenvolverá ao longo de tres anos, pretende modernizar os procesos de campo do kiwi. O proxecto, no que colabora ademais o CIAM (Centro de Investigacións Agrarias de Mabegondo), pretende determinar prácticas para reducir o emprego da auga no cultivo do kiwi, así como para mellorar a predición na aparición de enfermidades no cultivo e optimizar a toma de decisións agronómicas.

Galicia e a provincia de Pontevedra son líderes nacionais en produción de kiwi, con máis de 877 hectáreas cultivadas en toda a comunidade e unha produción que supera as 16.000 toneladas anuais. Desde as primeiras plantacións, en 1969 ata agora, o manexo do cultivo foi cambiando, xa que a superficie plantada foi en aumento e se realizaron diferentes investigacións, permitindo desta maneira coñecer mellor o kiwi e conseguir cada vez mellores resultados no seu cultivo.

O proxecto, promovido xunto con Kiwi Atlántico, ten un orzamento total de preto de 140.000 euros e está financiado dentro da convocatoria de proxectos innovadores de grupos operativos da Axencia Galega da Calidade Alimentaria de 2024 e conta co apoio do Feader (Fondo Europeo Agrario de Desenvolvemento Rural).