Asoporcel participa nun proxecto de etiquetaxe dos produtos derivados do Porco Celta

Presentación do proxecto en Lugo. Imaxe cedida

A Asociación de Criadores da Raza Porcina Celta (Asoporcel) celebrou no Pazo de Feiras e Congresos de Lugo unha reunión de presentación do grupo operativo ‘AsopQRcel’, destinado á trazabilidade dixital certificada por blockchain na cadea produtiva da raza autóctona Porco Celta.

O proxecto desenvolverase durante os próximos tres anos e porá o foco en desenvolver un sistema de trazabilidade certificado que permita garantir ao consumidor, non só a calidade e autenticidade do produto, senón tamén achegar información sobre o impacto ambiental e o benestar animal na súa produción.

Os portavoces da asociación indican que a través desta iniciativa engadirán un maior valor ao produto, ademais de marcar diferenciación respecto dos competidores e conseguir un mellor posicionamento no mercado. Todos estes son puntos chave para retroalimentar iniciativas de recuperación e posta en valor de terras en desuso, así como de asentamento e inicio de actividade económica de xente nova nas zonas rurais máis desfavorecidas, tarefas que Asoporcel destaca como esenciais para a revitalización do rural galego.

Xunto a Asoporcel, participan o cooperativa Tres Fuciños, o Instituto de Biodiversidade Agraria e de Desenvolvemento Rural (Ibader) da Universidade de Santiago de Compostela, Innogando e a Fundación Terreo. Así mesmo, contarán co apoio da consultora Medrar, da empresa de comunicación Transmedia e dos especialistas en desenvolvemento de software Pyramis.

A iniciativa bota a andar ao amparo das axudas convocadas pola Agacal no ano 2023 para a execución de proxectos innovadores dos grupos operativos da Asociación Europea da Innovación (AEI), cofinanciadas co Fondo Europeo Agrícola de Desenvolvemento Rural (Feader) no marco do Plan Estratéxico da Política Agraria Común (Pepac) 2023-2027.