A Misión Biolóxica de Galicia achega a ciencia aos colexios con BIOMISIÓN
O proxecto busca divulgar o coñecemento científico sobre cultivos agrícolas a través de ensaios interactivos
Estas semanas, “BIOMISIÓN” céntrase no alumnado de Primaria.
A Misión Biolóxica de Galicia (MBG) continúa coa segunda edición de “BIOMISIÓN”, un proxecto de cultura científica que busca achegar a ciencia á sociedade a través dos cultivos agrícolas.
Esta iniciativa, que comezou en 2022, desenvólvese durante o curso 2024-2025 con actividades dirixidas ao público xeral, alumnado, persoas con discapacidade e residentes en centros de terceira idade.
O proxecto ten como obxectivo divulgar os coñecementos científicos xerados na MBG e as súas entidades colaboradoras (a Cabaciña Rojo, o CIFP Carlos Orosa e Culler de Pau) sobre brásicas, bancos de sementes e variedades locais.
Estas semanas, “BIOMISIÓN” céntrase no alumnado de Primaria de varios centros de Pontevedra e A Coruña. O persoal científico e técnico da MBG-CSIC visita os centros para levar a cabo os “Ensaios de Investigación con Sementes”.
A través desta actividade, os estudantes aprenden o método científico de forma dinámica e interactiva, utilizando cultivos de brásicas nas hortas escolares. Os ensaios son deseñados e executados polo propio alumnado.
Na primeira visita aos colexios, o equipo entregou un “Kit de Ensaio” con cinco variedades de brásicas, cinco sementeiros, unha Guía Didáctica e fichas para a toma de datos. A xornada finalizou con seméntaa das sementes, marcando o “Día 0” do ensaio.
“Actualmente estamos a realizar as segundas visitas á maioría dos colexios co obxectivo de profundar no ámbito dos cultivos vexetais e a biodiversidade, así como colaborando para resolver as dúbidas e dar resposta ás preguntas e inquietudes que poidan xurdir”, explica Pedro Peón, responsable do proxecto.
Continúa dicindo que nunha “terceira xornada, dentro dunhas semanas, traballaremos sobre os datos recolleitos, analizándoos e elaborando, co alumnado, as conclusións do ensaio de investigación”.
BIOMISIÓN desenvolve tamén outras dúas liñas de actuación: Transferencia e o Congreso Científico. “A primeira pretende revelar como se articula un proceso de transferencia de coñecemento no ámbito agroalimentario”, explica Peón.
“A idea é mostrar como a colaboración entre diversas entidades pode dar lugar a que determinados resultados de investigación cheguen a converterse en produtos para o seu consumo alimentario”, engade.
O Congreso Científico terá lugar en outubro de 2025 en Pontevedra, estará dirixido ao alumnado que participe nos ensaios e o seu obxectivo é presentar os resultados alcanzados familiarizando aos estudantes con este tipo de eventos académicos.
A MBG-CSIC lidera o proxecto brindando apoio e asesoramento nos Ensaios de Investigación e o Congreso Científico. O proxecto conta, ademais, cunha páxina web onde os interesados poden ampliar a información sobre as actividades, as variedades de cultivo e os bancos de sementes.
