A Misión Biolóxica de Galicia únese a dúas redes estatais de investigación científica
Criobioloxía e xestión sostible de pragas son os eixos das redes financiadas pola AEI
A Misión Biológica de Galicia (MBG) participa en “Redes de Investigación”.
A Misión Biolóxica de Galicia (MBG) participa en dúas redes de investigación financiadas pola Axencia Estatal de Investigación (AEI), no marco do Programa Estatal de Transferencia e Colaboración 2024-2027. O obxectivo destas redes é crear sinerxías entre grupos de distintas institucións para optimizar recursos e potenciar capacidades comúns.
A MBG colabora na rede estratéxica “Desenvolvemento e colaboración en criobioloxía” (SecrioNet) e na rede temática “Transición cara unha xestión de pragas máis sostible mediante a integración de coñecementos básicos e aplicados” (REdSOSPlaga).
Investigación en criobioloxía
A Unidade Técnica de Biotecnoloxía e Mellora Forestal (MBG, Santiago de Compostela) participa en SecrioNet, unha rede nacional impulsada pola Universidade de Vigo a través do Centro de Investigación Mariña.
SecrioNet nace no seo da nova Sociedade Española de Criobioloxía (SECrio) como resposta á falta dunha estrutura que conecte profesionais de áreas como a biomedicina, agricultura ou conservación.
A criobioloxía estuda os efectos das baixas temperaturas nos sistemas biolóxicos e ten aplicacións clave fronte á crise climática, a perda de biodiversidade ou a produción sostible de alimentos.
Na rede participan tamén outras institucións como a Universitat de València, a Universitat Autònoma de Barcelona, a Universidade de Sevilla ou o Instituto de Ciencia e Tecnoloxía de Alimentos (ICTAN-CSIC).
O obxectivo é fortalecer a colaboración científica e achegar os avances en criobioloxía á sociedade. Entre as accións previstas está a creación do primeiro mapa nacional de laboratorios, empresas e expertos, así como dunha guía de investigación responsable neste campo.
Xestión sostible de pragas
O grupo de Xenética e Ecoloxía Forestal (MBG, Pontevedra) integra a rede REdSOSPlaga, liderada pola Universidade de Castela-A Mancha e que busca dar resposta á complexidade das interaccións planta-fitófago e ao seu impacto nos cultivos, mediante unha estratexia común que agrupe coñecementos de múltiples grupos de investigación.
Participan doce grupos de centros do CSIC e varias universidades españolas. O obxectivo é compartir coñecemento e facilitar a colaboración en tempo real entre investigadores cunha misión común.
A intención é avanzar tanto na comprensión básica como na aplicación práctica para a xestión eficaz de pragas, mediante propostas multidisciplinares. Tamén se impulsará a formación de investigadores e estudantes, e a transferencia de coñecemento a agricultores, empresas e autoridades, a través de encontros científicos e actividades divulgativas.
