O consorcio do proxecto I-ReWater organizará a próxima Conferencia Euromediterránea sobre Reutilización de Augas Residuais
Suporá unha oportunidade para visibilizar a investigación liderada pola Universidade de Santiago de Compostela para promover a xestión sustentable dos recursos hídricos na agricultura de regadío do espazo SUDOE
Imaxe da anterior edición, en Francia, onde Javier J. Cancela presentou os primeiros resultados do proxecto. Cedida
O consorcio do proxecto I-ReWater, coordinado polo profesor Javier J. Cancela, organizará a próxima edición 2026 da Conferencia Euromediterránea sobre Reutilización de Augas Residuais (REUSE EUROMED2026). Este evento científico está dedicado á reutilización de auga urbana rexenerada no Mediterráneo e Europa, centrándose nos múltiples usos relacionados coa reutilización de augas residuais tratadas e augas non convencionais a diversas escalas.
O evento reunirá investigadores, profesionais da auga, responsables políticos e expertos para compartir experiencias e puntos de vista sobre a reutilización de auga en Europa, incluíndo casos de éxito, análise de fracasos, perspectivas e enfoques metodolóxicos relacionados co deseño, posta en funcionamento e avaliación de proxectos de reutilización.
O consorcio de I-ReWater asistiu á anterior edición para avanzar os resultados do primeiros dez meses de traballo desta investigación aplicada. Durante o relatorio, Javier J. Cancela presentou a metodoloxía para elaboración da futura ‘Estratexia de Uso da auga Rexenerada no Regadío para o espazo SUDOE’ e explicou os ensaios realizados en varios dos quince pilotos localizados en España, Portugal e Francia acompañado de varios socios.
“O encargo da organización de REUSE EUROMED ao consorcio I-ReWater demostra a relevancia do traballo que realizamos en 2024. Este evento dentro de dous anos permitiranos, ademais, expor os principais fitos e resultados que obteremos, así como a presentación do Hub I-ReWater a nivel nacional e europeo”, valorou Javier J. Cancela.
Xestión hídrica adaptada ao cambio climático
O obxectivo do proxecto ‘I-ReWater. Xestión sustentable dos recursos hídricos na agricultura de regadío no espazo SUDOE’ é integrar o uso de auga urbana rexenerada en cultivos agrícolas, contemplando aspectos ambientais que aseguren o seu bo uso debido á crise climática actual. Foi aprobado durante a primeira convocatoria Interreg SUDOE 2021-2027 e conta cun orzamento de máis de 2,2 millóns de euros financiados nun 75 % polo Fondo FEDER.
Nas 15 accións piloto planificadas en cultivos leñosos (lúpulo, oliveiral, viñedo e almendro) e hortícolas (tomate e sandía), todos os sistemas de fertirrego incorporarán sensores de baixo custo a nivel de chan e planta que permitirán interpretar en tempo real parámetros como condicións climáticas, temperatura, cantidade de auga no chan ou nutrientes da planta.
Este sistema de axuda á decisión (DSS polas súas siglas en inglés) replicarase a nivel de usuario, permitindo ao agricultor coñecer cando e canto debe regar e, ao mesmo tempo, avanzar cara a unha agricultura máis eficiente e sustentable da man da economía circular.
O consorcio de I-ReWater tamén está a analizar o estado actual dos recursos hídricos no espazo SUDOE, con especial atención ao uso de augas rexeneradas na agricultura de regadío, así como aos efectos na produción e calidade dos cultivos, ao fin de favorecer a resiliencia e a seguridade das augas.
Xa no tramo final desta investigación, presentarase a ‘Estratexia de Uso da auga Rexenerada no Regadío para o espazo SUDOE’ e o global de resultados obtidos estará dispoñible nun Hub de coñecemento de acceso libre.
