A veterinaria Marta Miranda, nova directora do Campus Terra
A catedrática busca consolidar e proxectar o traballo desenvolvido nos últimos anos, dando continuidade a un modelo de campus especializado que é unha referencia no ámbito agroalimentario, ambiental e da saúde global
Marta Miranda Castañón, profesora da área de Ciencias Clínicas Veterinarias, acaba de ser nomeada directora do Campus Terra da USC. A profesora destaca que nesta nova etapa á fronte do Campus Terra tratará de contribuír a consolidar e proxectar o traballo desenvolvido nos últimos anos, dando continuidade a un modelo de campus especializado que hoxe é unha referencia no ámbito agroalimentario, ambiental e da saúde global.
En palabras da catedrática, o Campus Terra debe seguir avanzando “cara a unha maior especialización e liderado nos seus principais eixos: investigación, docencia e transferencia, potenciando especialmente a investigación interdisciplinaria, a captación de talento e proxectos competitivos, así como unha oferta docente innovadora e atractiva que contribúa tamén á captación de novo estudantado”. Ao mesmo tempo, engade que é fundamental reforzar a conexión co territorio e co tecido produtivo, favorecendo unha colaboración máis estreita coas empresas e entidades do sector.
Para a profesora Miranda o Campus Terra ten “unha enorme capacidade para xerar coñecemento aplicado, innovación e capital humano altamente cualificado ao servizo dun sector primario estratéxico para Galicia”. “Gustaríame contribuir a impulsar un Campus dinámico, aberto e con maior proxección nacional e internacional, pero sempre mantendo unha forte vinculación co territorio e co desenvolvemento económico e social de Galicia”, conclúe.
Traxectoria profesional
A profesora asturiana é licenciada e doutora en Veterinaria pola USC e catedrática na área de Ciencias Clínicas Veterinarias da Facultade de Veterinaria. Forma parte do grupo de investigación ‘IMedA: Investigación en Medicina Animal’ e é investigadora do Instituto de Investigación en Saúde Global e Desenvolvemento Sostible (iTERRA).
Desenvolve unha ampla actividade docente, clínica e investigadora en clínica médica veterinaria, especializada en gando vacún. A súa investigación céntrase no metabolismo mineral e nas enfermidades metabólicas. Ao longo da súa traxectoria na USC desempeñou diversos cargos de xestión e asumiu responsabilidades académicas e institucionais.
