A Escola de Enxeñería Forestal de Pontevedra valida un método pioneiro para medir os beneficios intanxibles dos bosques
A Escola de Enxeñaría Forestal valida unha metodoloxía innovadora para avaliar o impacto emocional e de benestar das masas arbóreas
Enrique Valero, responsable do grupo AF-4. / DUVI.
O grupo de investigación AF-4 da Escola de Enxeñaría Forestal leva máis dun ano traballando nunha metodoloxía para medir os beneficios intanxibles que os bosques achegan ás persoas. Saúde mental, benestar emocional e ocio na natureza son algúns dos aspectos que buscan avaliar cun sistema innovador, financiado polo Plan Social Ence Pontevedra.
A seguinte fase do proxecto permitirá poñer a proba os parámetros definidos polo equipo co obxectivo de validar esta metodoloxía. Enrique Valero, investigador principal do proxecto, explica que os bosques proporciona un conxunto de “bens intanxibles” relacionados coas “emocións, o benestar, o recreo na natureza, a liberación do estrés ou a saúde mental”.
Valero subliña que os bosques cumpren unha función esencial na fixación de carbono, na preservación da biodiversidade e nos ciclos hídricos. Non obstante, tamén destaca o impacto positivo nas persoas que frecuentan estas áreas naturais.
“Milleiros de persoas que cada fin de semana van os montes pasear, coller setas, atoparse a si mesmos na natureza” afirma, incidindo en que estes beneficios non se contabilizaron ata agora debido á falta dunha metodoloxía axeitada.
O grupo AF-4 tomou como referencia os Criterios de Xestión Forestal Sostible da conferencia de Helsinki, poñendo o foco no criterio 6, que fai referencia ás funcións socioeconómicas dos bosques. Así, identificaron sete subcriterios fundamentais para a avaliación, relacionados coas características da contorna, as emocións das persoas e os bens culturais presentes nos montes.
A partir destas dimensións, definíronse 29 subindicadores e 62 descritores para analizar aspectos como a experiencia dos visitantes, a calidade do aire ou a diversidade cromática da paisaxe. Tamén se consideran elementos culturais, como mámoas, cruceiros ou lendas vinculadas aos bosques.
Validación en Galicia, Santander e Huelva
A metodoloxía será sometida a unha proba práctica en distintos montes de España grazas á colaboración de Ence. As investigacións realizaranse en varias zonas de Galicia e tamén en superficies forestais xestionadas por esta empresa en Santander e Huelva.
Nesta fase do proxecto, analizarase a idoneidade dos descritores seleccionados e realizaranse axustes se fose necesario. Segundo Valero, este proceso permitirá integrar a experiencia humana nos seus percorridos polos bosques e identificar os valores intanxibles que xeran conexión emocional coa contorna.
O obxectivo final é que estes criterios poidan incorporarse aos modelos de xestión forestal sostible. Ademais, buscarase a súa inclusión no sistema de certificación PEFC, concretamente nunha avaliación “PEFC-Plus Servizos Ecosistémicos”. Isto permitiría recoñecer non só os aspectos ambientais xa avaliados pola norma AENOR, senón tamén os beneficios intanxibles dos bosques, a súa contribución á xestión hidrolóxica e a preservación da biodiversidade.
