FIREPOCTEP+ reúne a expertos en Santiago para debater solucións contra os incendios forestais

Imaxe de arquivo.

Santiago de Compostela acolle o próximo 23 de setembro a xornada “Innovar para protexer: coñecemento, territorio e empresa”, organizada polo proxecto estratéxico FIREPOCTEP+. A cita terá lugar no Auditorio FEUGA e enmárcase no Día da Cooperación Interreg 2025.

FIREPOCTEP+ está cofinanciado pola Unión Europea a través do Programa Interreg VI-A España–Portugal (POCTEP) 2021-2027. O seu obxectivo é dar resposta ao desafío dos incendios forestais, que na última campaña arrasaron máis de 390.000 hectáreas en España e 260.000 en Portugal. A magnitude deste problema reflicte a urxencia de impulsar solucións conxuntas baseadas en innovación, ciencia e xestión do territorio.

O evento reunirá a representantes institucionais, expertos, empresas, centros de investigación e sociedade civil. Todos eles debaterán como a cooperación transfronteiriza e a innovación poden transformar a xestión do territorio fronte ao cambio climático e o risco de incendios.

Apertura institucional

A inauguración contará coa participación de Delia Bonsignore, responsable do programa Interreg na DG REGIO da Comisión Europea; Isabel Gonçalves, responsable do programa Interreg POCTEP na Agência para o Desenvolvimento e Coesão de Portugal; representantes da Dirección Xeral de Fondos Europeos do Ministerio de Facenda en España; e Juan Picos, coordinador do proxecto FIREPOCTEP+.

Programa da xornada

A axenda da xornada estrutúrase en torno a sesións de debate, espazos de networking e actividades no terreo. As persoas interesadas poderán inscribirse na seguinte ligazón.

• 9:30-10:00 – Acreditación e benvida.
• 10:00-10:30 – Apertura institucional coa participación de representantes europeos, nacionais e do propio proxecto.
• 10:30-11:00 – Mesa 1: Paisaxe e prevención desde o local. Abordaranse boas prácticas en xestión do territorio, cooperación e ferramentas da Axenda Forestal Europea 2030, coa intervención de expertos da Xunta de Galicia, a Universidade de Vigo e o ICNF de Portugal.
• 11:00-11:30 – Mesa 2: Da investigación á empresa: innovación contra incendios. Presentaranse casos de transferencia tecnolóxica e experiencias de spin-offs e empresas, con representantes de EnergyLab, 3edata, AMETLAM e o Clúster Biomasa de Galicia.
• 11:30-12:20 – Pausa café e apertura da feira de innovación, con stands e startups.
• 12:20-12:50 – Mesa 3: Onde está o financiamento? Fondos, axudas e fórmulas mixtas. Participarán expertos en financiamento europeo, moderados pola Fundación Finnova.
• 12:50-14:30 – Feira activa con solucións tecnolóxicas e espazo de networking.
• 14:30-15:30 – Saída de campo ao Monte Pedroso, organizada pola Universidade de Vigo.
• 16:00-17:00 – Reunión interna do consorcio FIREPOCTEP+.

Un espazo para a cooperación

Ademais das mesas de debate, a xornada inclúe unha feira de innovación e stands de startups, ademais dun espazo de networking para favorecer o intercambio de experiencias e colaboracións.
A saída de campo ao Monte Pedroso permitirá analizar de forma práctica estratexias de prevención e xestión do territorio. Pola súa banda, a reunión interna do consorcio servirá como preparación para o próximo Comité de Dirección e as reunións técnicas que se celebrarán en Córdoba a finais de outubro de 2025.

Un proxecto estratéxico

FIREPOCTEP+ foi designado proxecto estratéxico polo Comité de Seguimento do programa Interreg. O seu labor na identificación de Zonas Estratéxicas de Xestión (ZEG) resulta clave para comprender o comportamento dos grandes incendios.
O lema do proxecto, “Sementar intelixencia preventiva”, resume o seu compromiso coa prevención, a sustentabilidade e a revitalización das áreas rurais afectadas.