Incendib unifica nun único mapa os incendios forestais activos de España e Portugal
A plataforma web, gratuíta e sen publicidade, integra datos satelitales e fontes oficiais para ofrecer información actualizada sobre incendios forestais sen substituír aos servizos de emerxencia
Incendib é unha nova ferramenta dixital que permite consultar nun único mapa a evolución dos incendios forestais activos en España e Portugal. O visor web, de acceso público, gratuíto e sen ánimo de lucro, reúne información procedente de distintas fontes oficiais e satelitales para facilitar o seguimento dos lumes de forma clara e transparente.
A plataforma combina tres niveis de información. Por unha banda, incorpora os focos térmicos detectados polos satélites da NASA mediante os sistemas VIIRS e MODIS. A iso suma os perímetros de superficie queimada elaborados polo programa europeo Copernicus, a través de EFFIS, así como a información operativa de organismos oficiais de diferentes comunidades autónomas e de Portugal, cando está dispoñible.
Un dos aspectos diferenciais de Incendib é que distingue expresamente entre unha detección satelital e un incendio confirmado, evitando interpretacións erróneas. Ademais, ofrece datos meteorolóxicos asociados a cada incendio e acceso á serie histórica oficial de incendios forestais en España.
Os seus responsables lembran que a plataforma ten un carácter exclusivamente informativo e que en ningún caso substitúe ás canles oficiais de emerxencia, como o 112, senón que pretende converterse nun recurso complementario para cidadáns, profesionais e medios de comunicación interesados na actualidade dos incendios forestais.
