A Fundación Caixa Rural Galega e a USC financian dous contratos predoutorais
O convenio, dotado con máis de 171.000 euros, permitirá apoiar durante tres anos a formación de persoal investigador en áreas estratéxicas para Galicia, desde a produción agroalimentaria ata a biodiversidade e o cambio climático
A Fundación Caixa Rural Galega Tomás Notario Vacas e a Universidade de Santiago de Compostela (USC) renovaron a súa colaboración para impulsar a investigación científica mediante a financiación de dous contratos predoutorais destinados a persoal investigador en formación. O acordo, formalizado o 22 de outubro na sede de Caixa Rural Galega, conta cunha dotación total de 171.783,36 euros.
O convenio permitirá financiar durante tres anos dous contratos para persoas matriculadas en programas de doutoramento da USC. A iniciativa busca favorecer a formación de novos investigadores, captar e reter talento e fortalecer a capacidade científica da universidade, ao tempo que promove proxectos vinculados a necesidades e retos de especial relevancia para Galicia.
A convocatoria abrangue ámbitos como a agricultura sostible, a produción vexetal, a saúde e a produción animal, a alimentación segura e saudable, a xestión forestal sostible, a biodiversidade e o cambio climático. Tamén inclúe investigacións relacionadas co desenvolvemento económico e social do medio rural, un eido considerado fundamental para o futuro do territorio galego.
Ademais da contratación do persoal investigador, o programa contempla a posibilidade de realizar estadías en centros nacionais e internacionais de prestixio. Esta opción permitirá ampliar a experiencia científica dos beneficiarios, adquirir novas competencias e favorecer a internacionalización da investigación desenvolvida no marco da universidade compostelá.
No acto de sinatura participaron o presidente da Fundación, Tomás Notario Vacas; o presidente de Caixa Rural Galega e vicepresidente da Fundación, Manuel Varela López, e outros membros do Padroado, entre eles Alberto Cepeda Sáez. Pola USC asistiron o vicerreitor de Coordinación do Campus de Lugo, Planificación Económica e Infraestruturas, Roberto Bande Ramudo, e a directora do Campus Terra, Marta Miranda Castañón.
Con esta renovación, ambas institucións reforzan a súa aposta pola cooperación entre universidade e sociedade como vía para xerar coñecemento e impulsar solucións innovadoras. A Fundación enmarca esta iniciativa na súa finalidade de apoiar a investigación, a educación, a innovación e o desenvolvemento sostible, con especial atención aos sectores agroalimentario, forestal e medioambiental.
O acordo pretende, así, contribuír á competitividade dos sectores produtivos galegos e á creación de oportunidades para as novas xeracións, vinculando a formación investigadora ao progreso económico e social de Galicia.
