A EE Forestal de Pontevedra reunirá as e os principais especialistas en fungos, liques e algas de España e Portugal

Expertos e expertas no estudo de fungos, liques ou algas de diferentes puntos de España e Portugal e doutros países europeos reuniranse en Pontevedra entre o 7 e o 10 de xullo, con motivo da celebración do XXIV Simposio Internacional de Botánica Criptogámica, que terá lugar na Escola de Enxeñaría Forestal. Organizado por investigadores e investigadoras das universidades de Vigo, A Coruña e Santiago de Compostela, este foro científico céntrase no estudo dos organismos vexetais que non posúen flores, como fungos, liques, algas, briófitas, pteridófitas ou mixomicetos. Cun formato híbrido, que combina o seguimento presencial e virtual, a organización prevé reunir en Pontevedra máis de 150 investigadores e investigadoras, na que será a primeira edición deste evento en Galicia nos últimos 30 anos.

De carácter bienal, trátase do foro “de referencia” para os expertos e expertas en botánica criptogámica, como explica o investigador da UVigo e presidente do comité organizador, Mauro Rivas Ferreiro. Celebrado por primeira vez en Pamplona en 1972, comezou sendo “un simposio español, logo ibérico e agora internacional”, converténdose nunha “cita imprescindible para a comunidade científica dedicada á criptogamia”. Trátase ademais da primeira edición na que este evento terá como sede a Universidade de Vigo e a segunda na que terá lugar en Galicia, despois de que se desenvolvese en Santiago de Compostela en 1995.

Do impacto do cambio climático ao aproveitamento biotecnolóxico

O simposio terá como lema Diversidade criptogámica: conservando o pasado, innovando o futuro e buscará servir como “foro de discusión sobre os avances máis recentes no campo da botánica criptogámica, abordando temas clave como a biodiversidade e a conservación, o impacto do cambio climático, a fisioloxía ou o aproveitamento biotecnolóxico destes organismos”. Con ese obxectivo, o programa do simposio abrangue seis sesións plenarias, a cargo de “destacados especialistas científicos” dos diferentes ámbitos da criptogamia, como a neerlandesa Jorinde Nuytinck, experta en micoloxía; o alemán Patrick Jung, especialista en liquenoloxía; Heroen Verburuggen, do ámbito da ficoloxía; ou os españois Jaime Pellicer, Teresa Boquete e Katia Cezón.

No programa deste evento insírense tamén 16 sesións temáticas, tres sesións de presentación de pósters e unha mesa de debate sobre os retos da investigación en criptogamia, dirixida a investigadores noveis. O encontro académico verase complementado, na xornada do 10 de xullo, por dúas saídas de campo; un percorrido pola Serra do Cando e unha actividade de mergullo na contorna das Cíes, dirixida a dar a coñecer a biodiversidade mariña do Parque Nacional das Illas Atlánticas.

Inscricións abertas

Nesta XXIV edición, a organización prevé reunir preto de 150 persoas de forma presencial e máis de 60 na modalidade virtual, que se levará a cabo a través do Campus Remoto da UVigo. Non obstante, as inscricións poderán realizarse ata o 24 de xuño, á vez que permanece tamén aberto o prazo de presentación de resumos para os investigadores e investigadoras que queiran presentar os seus traballos.

Cun comité organizador integrado por profesorado e alumnado das tres universidades públicas galegas, trátase dun simposio promovido pola Sociedade Ibérica de Micoloxía, a Sociedade Española de Liquenoloxía, a Sociedade Española de Ficoloxía, a Sociedade Española de Brioloxía e o Grupo de Traballo en Pteridoloxía da Sociedade Española de Botánica.

O simposio desenvolverase en Pontevedra entre o 7 e o 10 de xuño